Willkumme zum Fischerfescht!

Ehr liewe Leit, was ich eich saag,
de Sunndag steicht en großer Daag.

Im Altriper Waldpark is was los,
do zieht die Gemää e Fischerfescht uff, ganz groß.

Awer halt ich hab mich geerrt, ich muß eich was saa,
dess fangt jo schunn am Samstag Owend aa.

So am halwer achde zieht e Kappell vunn stick 20 Mann
durch des halwe Derfel dann,

bis hie zu de Fischerkeenigin erm Haus
unn begleit se mit Musik in de Waldpark enaus.

Do steht alles zum Empfang bereit
unn die verzehlt dann vunn Altrips uralter Vergangenheit.

Wie vor viele hunnert Joohre
Unser Ahne fascht allminanner Fischer ware.

E paar enzelne henn Holzschuh unn Bäckstää gemacht,
sich so miesam durchs Lewe gebracht.

Iss dann die ganz Zeremonie vorbei,
do gehts erscht iwer zum gemütliche Teil.

Do kann mer bei Fische, Bier, Worscht, Weck unn Woi
so recht vunn Herze luschdich sei.

In denne drei Daag werd so allerhand geboode,
awer nää, mer darf jo net alles verrode.

Ehr mißt kumme, mißt Eich iwerzeiche,
do kennt Ehr Eich im Esse unn Drinke eiche.

Drumm sollt Ehr uns herzlich willkumme sei
zum Fischerfescht in Altrip am Rhei.

 
Autor unbekannt
(Quelle: Nachrichtenblatt der Gemeinde Altrip vom 4. Juli 1963)